31 may 2010

Debako triatloia, negarrez


Atzo, maiatzak 30, Debako triatloia izan zen, sprina (750-26-5). 33 neskak eta 281 mutilek amaitu genuen proba. Egoitz Zalakain (1:13:13) eta Estefania Gomez (1:24:36) izan ziren azkarrenak. Tartean izan ginen Elgoibarko lau mutil eta ni neu.



Mutilak (281 guztira):
  • 90. Ruben Lopez (1:24:47)
  • 104. Javi Fernandez (1:25:49)
  • 271. Mikel Etxabe (1:49:05)
  • 272. Goiatz Leibar (1:49:05)

Sailkapen osoa

Neskak (33 guztira):
  • 14. Ainhoa Lendinez (1:36:37)

Sailkapen osoa

Aurten ez dut igeri egin, eta kaka eginda joan nintzen, baina ilusioz ere bai, bizikletan ahal nuen guztia aurreratzeko. 12. postuan atera nintzen uretatik, aita eta ama hondartzan nituen, eta haiek eman zidaten uneoro besteen berri. Itziarren gora hasi eta Javirekin egin nuen bat, Urgaziko kidea eta lagun mina. Gogor ekin genion mendateari, bat, bi, hiru, lau...neska askori hartu genien aurrea. Irati Etxaburu lehengo urteko garailea bera ere aurreratu nuen eta ikaratu ere egin nintzen, ez al dut ba pott egingo!!! Maider Vallina lehenengoetakoa ateratzen da uretatik, eta Itziarrera iristen hartu nion aurrea. Itzel nindoan, aita motoan zihoan ondoan, eta babes handia zen niretzat. Beheraka hasi, ordea, eta bizikleta dantzan hasi zen. Ezin nuen sinetsi, ez nuen ikusi nahi, gurpila zulatu nuen!!!!! Ametsgaiztoa egia bihurtuta. Negarrez. Puzgailu eske, eta nerbioiak tarteko, kosta zitzaigun ohartzea guk geuk bageneukala gurea. 10 minutu galdu genituen, baina aitak animatuta amaitu nuen proba, animoak ematen ari zirenengatik. Inoiz ez dut horren gertu sentitu podiuma, 3. postuan nindoan gurpila zulatu nuenean. Badakit askoz ere okerragoa izan zitekeela, eroriz gero, esaterako. Baina Debako triatloia etxean lehiatzea zen, eta entrenamenduen sari ezin hobea izango zen. podiumera igotzea Hala ere, eskerrik asko denoi, familiakoak, kuadrilakoak, lagunak, Urgazikoak, elgoibartarrak! Hurrengoan ere dena ematera aterako gara.

Bermeoko triatloia

Larunbatean, maiatzak 29, Bermeoko triatloi sprina izan zen (750-25-6). 28 neska eta 181 mutil batu ziren proban, eta Felix Javier Martinez(1:12:19) eta Estefania Gomez (1:27:54) izan ziren azkarrenak. Tartean izan zen, Urgaziko kide Mikel Calvo eta lehen 50 postuetan sailkatu zen. Zorionak Mikel!
  • 42. Mikel Calvo (1:22:39)
Sailkapen osoa

24 may 2010

Hondarribiko triatloi herrikoia

Larunbatean, maiatzak 22, Hondarribiko triatloi herrikoia jokatu zen (325-11-2,5).









24 neska eta 62 mutil izan ginen guztira. Elgoibartik, berriz, lau lagun, nere ahizpa tartean, bere lehen proban. Giro aparta geneukan, eguraldi bikaina eta babes-talde ezin hobea. Urak ematen zigun beldurra, eta hasierako kolpeak gaindituta, pozik ibili ginen bizikletan eta korrika. Hala ere, proba guztiak, motzak izanagatik, ikaragarri gogorrak direla ikusi genuen.
















Nik neuk nire lehen garaipen txikia lortu nuen, ezin nuen sinetsi ere egin. Uretatik 3. edo 4. atera eta bizikletan aurreratu nituen neska guztiak, baita mutil asko ere. Azkenean, sailkapen orokorrean ere 7. amaitu nuen, eta ezin sinetsita, gustura benetan. Nereak ere lasterketa bikaina egin zuen. Uretatik atzeraxeago atera arren, bizikletan ongi moldatu zen eta korrika hainbat neska aurreratu zituen. Bosgarren azkenean, zorionak Nere! Eta mutiletan, Jon Agirrebeñak uretan galdutakoa bizikletan berreskuratu zuen eta korrikako saioan postuari eutsi zion. 6. izan zen sailkapen orokorrean. Roberto Alonso 34. postuan sailkatu zen. Egun aparta izan zen, triatloi zaleontzat!





Neskak (24 guztira):
  1. Ainhoa Lendinez (41:04)
  2. Amets Maiztegi
  3. Ainhoa Larrañaga (47:14)
  4. Maria Eugenia Ortiz (47:49)
  5. Nerea Lendinez (48:35)
Sailkapen osoa


Mutilak (62 guztira):
  1. Alberto Barrio (38:41)
  2. Raul Gomez del Rio (38:51)
  3. Jose Ignacio Lopez (39:41)
6. Jon Agirrebeña (40:56)
34. Roberto Alonso (49:08)

Sailkapen osoa

16 may 2010

Zegama-Aizkorri
























42,195 metro. 5472 metroko desnibela. Elurra, euria, haize, hotza. 409 korrikalari ausart. Zegama-Aizkorri mendi-maratoia munduko zirkuituko proba ezaguna da, urtetik urtera partaide gehiago, zale gehiago eta malko gehiago erakartzen duen proba. Izan ere, ez da soilik korrikalariak nahi eta ezinean ikustea, ez da soilik jendea animatzen ikustea, ez da soilik hotzaren eta beroaren aurkako borroka jasatea. Zegamako herri xumetik irten eta Aizkorri-Urbia-Andraitz paraje ezin zoragarriagoak berezi egiten du Zegama-Aizkorri mendi-lasterketa.




















Punta-puntako korrikalariak, eta punta-puntako giroa. Irrati eta telebistak zuzenean euskaraz hango berri ematen, eta etxetik jarraitu dugunok ere hunkituta. Berriz ere Kilian Jornet (3:56:30) katalana eta Emanuela Brizio italiarra (4:47:51) izan dira garaile. Ez dute errekorrik hautsi, baina lasterketa paregabea egin dute. Horrez gain, erabat hunkitu nau Aitor Osa txirrindulari ohia (4:08:27) bigarren postuan iritsi dela jakiteak. Asko sufrituta iritsi da lasterketara, eta gaur ere gogorra izan da Aizkorrikoa berarentzat. Nerea Amilibia aiarra (5:09:54) bigarren izan da emakumezkoetan, eta lasterketa gogorra izan dela esan du. Elgoibartik Jon Revert, Asier Arrieta, Josu Mendikute, Manolo Ramos (David Conderen dortsalarekin) eta Negri mendi-korrikalari handiak izan dira. Zenbat itzuli egiten dituzte gure mutil hauek urtean Sallobente bailaran? Uda nahiz negua, eguzkia nahiz euria. Hori da hori konstantzia eta ilusioa. Zorionak guztiei, bihotz-bihotzez.

  • 100. Manolo Ramos (5:12:00)
  • 122. Jon Revert (5:21:58)
  • 243. Josu Mendikute (6:02:40)
  • 294. Asier Arrieta (6:26:39)
  • 498. Ignacio Perez (7:22:02)

Donostiako maratoi erdia

15 may 2010

Podiumari begira



















Atzo, maiatzak 15, Bilboko duatloian izan ginen Javi Fernandez eta ni neu. Ikaratuta atera ginen, hotza, euria eta haizea mehatxuka geneuzkan eta. Korrika majo moldatu ginen. Radka Vodickoba txekiarra beste lasterketa batean aritu zen, baina gure maila apalean Inma Ruiz, Maider Vallina, Saiola Olite eta Nerea Gambra nituen begiz jota. Mutiletan Galibier eta Capoferri faboritoak ere nagusi izan ziren.

Bizikletan esana ziguten Artxandako igoerak asko hausten duela proba eta egia esan, hiru postu aurreratu ahal izan ditut. Javi ere gogotik saiatu da niri laguntzen, beheraka tiraka jarrita. Azkenean, 3. atera naiz boxeetatik korrikako azken saioari ekiteko baina Cristina Allesek ez du barkatu eta aise aurreratu gaitu 2,5 kilometroan ni eta Saioa. Azkenean laugarren, eta Javik eta nik ia eskutik helduta amaitu dugu proba.

Podiumari begira egon naiz, baina ez penaz, pozik baizik! Eskerrik asko Javi! Eta eskerrik asko betiko nere babes-taldeari!

























Mutilak (236 guztira):
  • 1. Laurient Galinier (58:37)
  • 2. Nicolas Capoferri (58:38)
  • 3. Kepa Ruiz (58:45)
  • 112. Javi Fernandez (1:11:41)
Sailkapen osoa

Neskak (16 guztira):
  • 1. Radka Vodickova (1:07:23)
  • 2. Cristina Alles (1:11:18)
  • 3. Saioa Olite (1:11:29)
  • 4. Ainhoa Lendinez (1:11:44)

9 may 2010

Ermuko duatloia: 5. eta 15.

Atzo, maiatzak 8, Ermuko I. duatloia izan zen, sprint luzerakoa (5,3-23-2,5). Asteazkenean nahiko lasai nengoen, 8 neskak eman genuen izena eta kirioak ez nituen dantzan. Iritsi da ostirala, ordea, eta 20 neska gaude zerrendan, Ainhoa Murua zarauztar olinpikoa eta Cristina Alles kantabriarra tartean. Bi lasterketa izango zirela argi neukan, eta orduan bai, orduan nerbioak dantzan hasi ziren. Halakoetan, lasterketak berak herrikoi izateari uzten dio, eta olinpiko eta profesionalak batetik eta herrikoiok bestetik aritzen gara.






Gorputzeko atal guztiak sentitzeko balio izan zidan atzoko lasterketak. Proba hasi aurretik aitarekin bizikletako mendi-ibilbidea ikusi nuen. Lagungarria izan ohi da, baina atzokoan ikaratzeko ere izan zen. Areitio gaina eta Trabakua igo behar genituen, ezin ibilbide gogorragoa izango zen, eta korrika ere aldapa bat hiru aldiz igo behar.

16:00ak jo orduko, ahoa lehor daukat, egarri naiz, eta oraindik ez gara hasi ere egin. Luze joan dira minutuak irteera eman duten arte. Josean ere hor dago, taldekidea, buru-buruan, gaur dena ematera aterako da.


Korrika bi itzuli egin ditugu, eta begiz jota nituen neskei eustea lortu dut, baina ibilbideko aldapak min eman du, eta lasterketa asko sakabanatu da. Egarri naiz, oso egarri, baina bat-batean osaba eta izeba ikusi ditut, lehengusina ere bai, eta haien animoek ziztuan eraman naute aurrera. 8. sartu naiz boxeetan, ondo noa, baina Arbizukoa etorri zait gogora. Normalean bizikletatik korrikarakoa izaten da zailena, baina Arbizun niri korrikako lehen saiotik bizikletarakoa egin zitzaidan bereziki gogorra, hankak berotzea kosta egin zitzaidan.





Berehala harrapatu nau atzetik zetorkidan neska batek. Korrika baino hobeto dabil bizikletan, eta Arbizun ezin izan nion eutsi. Bere gurpilari heldu eta pixkanaka postuak aurreratu ditugu. Zapatilak lotzen joan naiz lehen kilometroan, igoera polita daukagu, Mallabiraino, eta ondoren Zaldibarreraino beheraka. Mutil talde batek hartu gaitu, baina beherakoan aurrekoa mugitu egin da, eta galgari ematean bizikleta ezker-eskuin mugitu zait. Hankak dardarka geratu zaizkit, eroriko nintzela uste nuen, baina arnasa sakon hartu eta nola hala eutsi diot. Tripako minez nago, bazkaritan jandako makarroiak bueltaka ditut nonbait. Trabakua igotzen hasi gara, mutil askorekin goaz. Askok harrapatu gaituzte beherakoan baina Trabakuako saihesbideak laster jarri du nor bere lekuan. Indarrak gutxitzen doaz eta igoera luzea da. Halako batean, aita eta osaba ikusi ditut bide bazterrean, oihu egin diet, eta tripako minak nerbio bihurtu dira. Akuilua izan da, eta gogor ekin diot goraka. Zer den babes-talde ona eramatea!


Gogorra izan da bizikletako saioa, Mallabitik behera kontuz jaitsi gara eta berriro gara boxeetan. Hiru neska goaz elkarrekin, eta epaileak kaskoa lotzeko esan dit, behar baino lehenago askatu dut nonbait. Atera gara korrika, eta lehen urratsak egin orduko megafoniatik entzun dugu Ainhoa Murua helmugaratzen ari dela. Aldaparen beldur naiz, atzean geratu da nesketako bat eta bi goaz 4. eta 5. postuen lehian. 300 metro falta direla, ama, ahizpa, izeba eta lehengusina ikusi ditut, 4. postua eskura daukat, eta sakatu egin diot. Baina helmugako alfonbra gorria zapaldu dudanean atzetik zetorkidanak erasoa jo dit, eta hor gelditu naiz, ezinean eta 4. postuari begira. 5. azkenean, eta egia esan, nekatuta, baina pozarren!



Mutiletan Raf Baugh australiarrak irabazi zuen lasterketa, baina Josean Ruiz elgoibartarraren lana goraipatu nahi dut. 14. postuan sailkatu zen korrika, 17 minutu pasatxo behar izan zituen 5,3 kilometro egiteko, eta ondoren, bizikletako saioan ere 20. egin zuen, orduko 30 kilometroko batez bestekoa eginda gainera. 15. postuan sailkatu zen azkenean. Zorionak Josean!!!!!




Neskak (20 guztira):
  • 1. Ainhoa Murua (1:10:23)
  • 2. Cristina Alles (1:16:50)
  • 3. Inma Ruiz (1:19:09)
  • 4. Nerea Gambra (1:20:04)
  • 5. Ainhoa Lendinez (1:20:06)
Sailkapen osoa

Mutilak (109 guztira):
  • 1. Raf Baugh (1:04:24)
  • 2. Kepa Ruiz (1:04:53)
  • 3. Ander Aguirre (1:05:34)
  • 15. Josean Ruiz (1:09:23)

Izarraitz, mendi-lasterketa



Izarraitzeko paraje ederrean, mendi-lasterketa izan da gaur, 21,2 kilometrokoa. 153 lagun lehiatu dira guztira eta Walhter Becerra (1:56:28) eta Aitziber Ibarbia (2:36:15) izan dira azkarrenak. Nesketan gainera, lehia estua izan da, Yolanda Gurendezek, bigarren sailkatuak, 35 segundo gehiago baino ez ditu behar izan eta. Elgoibartik Aitor Osoro eta Javi Fernandez izan dira mendi-lasterketa gogor honetan.

  • 34. Aitor Osoro (2:26:22)
  • 127. Javi Fernandez (2:57:44)


Sailkapen osoa

Martin Fizen omenezko maratoia

Gaur, maiatzak 9, Martin Fizen omenezko maratoia izan da Gasteizen. Ohi bezala, lasterkari asko bildu dira proba ezagun honetan, 42 kilometro eta 195 metro korrika egiteko. 373 lagun izan dira guztira eta Jaime Moibenek irabazi du lasterketa (2:28:13). Nesketan Gemma Perezek aise irabazi du proba (3:08:51). Elgoibartik Unai Narbaizak lasterketa bikaina egin du eta 6. postuan helmugaratu da. Zorionak Unai!

  • 6. Unai Narbaiza (2:39:08)


Sailkapen osoa

Anbotoko III. kilometro bertikala

Atzo, maiatzak 8, Anbotoko III. kilometro bertikala jokatu zen, mendi-lasterketa arrakastatsua. 3,8 kilometroan 10,92 metroko desnibela gainditu zuten korrikalariek. 187 mutil eta 19 neska izan ziren guztira, eta Nerea Amilibia aiarra (50:16) eta Didier Zago (39:28) izan ziren garaile. Morkaiko mendi taldearen izenean lau elgoibartarrek hartu zuten parte.

  • 17. Iñigo Lariz (46:47)
  • 21. Haritz Arrieta (47:05)
  • 51. Gotzon Zulaika (51:43)
  • 119. Eduardo Uribe (57:41)



Sailkapen osoa

5 may 2010

Wildflower Kalifornian

Wildflower Kaliforniako triatloiaren festa da. Asteburu batean, musikaren festibal erraldoi bat izango balitz bezala, 10.000 pertsonatik gora batzen dira San Frantzisko eta Los Angeles artean, hiri guztietatik urrun dagoen presa batean, Lake San Antonio paraje berdean.













Ibon Gabilondo triatleta elgoibartarra bertan izan zen, eta hark eman digu esperientzia honen berri. Kanpin eta autokarabana artean AEBetako txoko guztietatik baina batez ere Kaliforniako estatutik etorritako milaka triatleta eta triatloi jarraitzaile biltzen dira proba honetan.
















Horrelako ekitaldi erraldoi bat AEBetan eta Kalifornian bakarrik da posible, triatloiaren merkatu handiena dago bertan eta amerikarrak ezagututa, nork bere erara hartzen du kirol hau: batzuek muturreraino eramanda beraien afizioa; eta besteek denborapasa bezala. Denetarik aurkituko dugu hemen: zahar zein gazte, hankak falta dituztenak, minbizia pasatutakoak, beltzak, txuriak, potoloak, meheak ... denetarik.

Larunbatean 1860 pertsonak parte hartu zuten Triatloi luzean (ironman erdiko distantzian, 1900+90+21.1) eta 998 lagunek mendiko triatloian. Igandean, berriz, 2362 kirolari izan ziren distantzia olinpikoko triatloian. Distantzia luzeko proban munduko triatleta profesional onentsuenak zeuden lehian. Euskal Herritik Virginia Berasategui eta Eneko Llanos joan ziren, biak ala biak faboritoen artean. Munduko Ironman erdiko txapeldunak ere bertan zeuden, Michael Raelert alemaniarra eta Julie Dibens ingelesa.

Lasterketa gogorra da, bizikletako lehen tartea ez da zaila, baina bukaera partean asko korapilatzen da aldapetan. Korrikako maratoi erdia oso gogorra da, lakuaren ingurutik eta kanpin artetik, mendiko pista artetik, gora eta behera. Larunbatean haize fina zebilen eta asko laguntzen zuen korrika egiteko. Irteera mailaka ematen da, lehenik profesionalak, gero mutilak 20-24 urte bitarteakoak, ondoren 25-29 ..... neskak ondoren .... guztira 19 irteera, 10 minutuko tarteetan eta 100 pertsona inguru tarte bakoitzean. Raelert eta Dibens faboritoek irabazi zuten proba. Alemaniarrak egin zituen bizikleta eta korrika denbora onenak eta 5 minutuko aldea atera zion bigarrenari. Nesketan Dibens ek ere erakustaldia eman zuen 7 minutuko tartea egin zuen bigarrenarekin. Ibon Gabilondoren ustez, korrikako denbora ikusita, ikaragarria da maratoi erdia ordubete eta 15 minutuan egitea, baina horregatik dira munduko onenak...
Lasterketa lasai hartu zuen Ibonek, ez zuelako zirkuitua ezagutzen eta indarrak bukaerarako uzteko. Azkenerako gogorra egin zitzaion eta 5 ordutik beherako denbora egin zuen: 4 ordu eta 53 minutu. Karrera polita eta era berean gogorra da, lastima hain urruti egotea eta ez aukerarik izatea urtero korritzeko!

2 may 2010

Zornotzako duatloia

Atzo, maiatzak 1, Zornotzako duatloia jokatu zen, distantzia motzeko proba: 10 km korrika, 38 km bizikletan eta beste 5 km korrika. Itsaso Leunda (2:13:50) eta Raf Baugh (1:54:46) izan ziren garaile proban, eta guztira, 6 neskak eta 109 mutilek amaitu zuten proba. Tartean Josean Ruiz eta Javi Fernandez elgoibartarrak izan ziren, biek ere primeran amaitu zuten duatloia. Zorionak!


  • 17. Jose Antonio Ruiz: 35:50-1:12:25-17:46 (2:06:01)
  • 64. Javi Fernandez: 39:44-1:19:54-19:33(2:19:11)


Sailkapen osoa